ಯಾದವ ನೀ ಬಾ ಯದುಕುಲ ನಂದನ  

ಮಾಧವ ಮಧುಸೂದನ ಬಾರೋ |

ಸೋದರಮಾವನ ಮಧುರೆಲಿ ಮಡುಹಿದ ||

ಯಶೋದೆ ಕಂದ ನೀ ಬಾರೋ              ||ಪ ||

||ಯಾದವ ನೀ ಬಾ ||

ಕನಕಲಂದುಗೆ  ಗೆಜ್ಜೆ ಘಲುಘಲಿರೆನುತಲಿ |

ಝಣ ಝಣವೆನುತಿಹ ವನಾದದಲಿ |

ಚಿಣಿಕೋಲು ಚೆಂಡು ಬುಗುರಿಯನಾಡುತ |

ಸಣ್ಣವರೊಡಗೂಡಿ ನೀ ಬಾರೋ ||

||ಯಾದವ ನೀ ಬಾ ||

ಶಂಖ ಚಕ್ರವು ಕೈಯಲಿ ಹೊಳೆಯುತ |

ಬಿಂಕದ ಗೋವಳ ನೀ ಬಾರೋ |

ಅಕಳಂಕ ಮಹಿಮನೆ ಆದಿನಾರಾಯಣ |

ಬೇಕೆಂಬ ಭಕುತರಿಗೊಲಿ ಬಾರೋ ||

||ಯಾದವ ನೀ ಬಾ ||

ಖಗವಾಹನನೇ ಬಗೆಬಗೆರೂಪನೆ |

ನಗುಮೊಗದರಸನೆ ನೀ ಬಾರೋ |

ಜಗದೊಳು ನಿನ್ನಯ ಮಹಿಮೆಯ ಪೊಗಳುವೆ |

ಪುರಂದರ ವಿಠಲ ನೀ ಬಾರೋ  ||

||ಯಾದವ ನೀ ಬಾ ||

***