ಎಷ್ಟು ಬಾರಿ ಮೊರೆ ಇಡಲಿ ಶಂಭೋ ಶಂಕರ
ಕಷ್ಟಗಳ ನೀಗಿಸು ಬಾ ಹೇ ಮಹೇಶ್ವರ ||
|| ಪ ||
ಅಜ್ಞಾನದ ಅಂದಕಾರ ಮನಕೆ ಸುತ್ತಿದೆ
ಮುಂದೇ ದಾರಿ ಕಾಣದಿದೆ ಭಯವು ಮುತ್ತಿದೆ |
ಪಾಪಗಳ ಹೊರೆಯನ್ನು ಹೊರಲಾರದೆ
ಭವಬಂಧದ ಜಾಲದಿಂದ ಬರಲಾರದೆ |
ತತ್ತರಿಸಿಹೆ ನೊಂದುಬೆಂದು ನಿಂದಿರುವೆನು
ನಿನ್ನೊಲುಮೆಯ ಸುಧೆ ಹರಿಸಿ ಕಾಪಾಡು ದೇವಾ |
|| ಎಷ್ಟು ಬಾರಿ ಮೊರೆಯಿಡಲಿ ||
ಪಶ್ಚಾತಾಪವೆಂಬ ಬೆಂಕಿ ಸುಡುತಿದೆ ನನ್ನ |
ಮಲಿನ ಕಳೆದು ಆಗಲಿ ಮನ ಪುಟವಿಟ್ಟ ಚಿನ್ನ |
ಕಂಬನಿಯಲಿ ಪಾದ ತೊಳೆವ ಆಸೆಯಾಗಿದೆ|
ನಿಂತಿರುವೆನು ಮೌನದಲ್ಲಿ ಮಾತು ಬಾರದೆ |
ಕರುಣಿಸಿ ಪ್ರಭು ನೀ ಮನ ನೆಮ್ಮದಿ ತಾರಾ |
ಕೈ ಹಿಡಿದು ನಡೆಸೆನ್ನ ಹೇ ದೀನಬಂಧೂ |
|| ಎಷ್ಟು ಬಾರಿ ಮೊರೆಯಿಡಲಿ ||
ಆತ್ಮವೆನುವ ಪ್ರಣವದಿಂದ ಆರಾಧಿಸುವೆ |
ಉಚ್ವಾಸ ನಿಶ್ವಾಸದಿ ಕೀರ್ತಿ ಹಾಡುವೆ |
ಪ್ರಾಣ ಜ್ಯೋತಿ ದೀಪದಿಂದ ಆರತಿಗೈವೇ |
ಭಕ್ತ ಕುಸುಮ ತವ ಪಾದಕೆ ಅರ್ಚನೆಗೈವೇ
ಮುಕ್ತಿದಾರಿ ತೋರೋ ಹೇ ಕರುಣಾಮಯನೇ
ತವಪಾದ ಪೂಜೆ ನೀಡೋ ಪಾವನಾಂಗನೇ
|| ಎಷ್ಟು ಬಾರಿ ಮೊರೆಯಿಡಲಿ ||
***