|| ಬೆನಕ ಬೆನಕ ಏಕದಂತ…
ಪಚ್ಚೆ ಕಲ್ಲು ಪಾಣಿಪೀಠ
ಮುತ್ತಿನುಂಡೆ ಹೊನ್ನ ಘಂಟೆ ಒಪ್ಪುವ
ಗುಡ್ಡಬೆಟ್ಟದಲಿ ತಂಬಿಟ್ಟು ಮುಕ್ಕುವ
ಪುಟ್ಟ ವಿಘ್ನೇಶ ದೇವರಿಗೆ
ಇಪ್ಪತ್ತೊಂದು ನಮಸ್ಕಾರಗಳು ||
ಬೆಳಗಾಯ್ತು ಏಳು ಹೇ ಮುದ್ದುಬೆನಕ
ಭುವಿಯೆಲ್ಲ ರಂಗಾಯ್ತು ನೀ ಏಳು ಬೆನಕ ||
|| ಪ ||
ಅಂಬಾಪ್ರಿಯತನಯ ಆದಿ ಪೂಜಿತನೆ
ಮೂಡಣದೆ ರವಿಯೆದ್ದ ನೀ ಏಳು ಬೆನಕ
||ಬೆಳಗಾಯ್ತು ಏಳು||
ಮಾಮರದಿ ಕೋಗಿಲೆಯು ಪಚ್ಚವರ್ಣದ ಗಿಳಿಯು
ಸುಪ್ರಭಾತವ ನಿನಗೆ ಹಾಡುತಿವೆ ಬೆನಕ ||
ಆ ನಿನ್ನ ಸುಂಡಿಲಿಯು ನಿನ್ನ ಬರುವನು ಕಾದು ||
ಕಾಳುಗಳ ತಿನ್ನುತಲಿ ಕುಳಿತಿಹುದು ಬೆನಕ
||ಬೆಳಗಾಯ್ತು ಏಳು||
ಹುಲ್ಲುಗರಿಕೆಯು ಧೂರ್ವೆಯಾಗಿ ಕಾದಿಹುದು
ಪೂಜೆಯಲಿ ನಿನ್ನ ಅಲಂಕರಿಸಲೆಂದು |
ನಾಗಲಿಂಗದ ಪುಷ್ಪಕಮಲಗಳು ಕಾದಿಹವು ||
ಗಣಪತಿಯ ಅರ್ಚನೆಗೆ ಸಿಧ್ಧವಾಗಿಹೆವೆಂದು
||ಬೆಳಗಾಯ್ತು ಏಳು||
ನಿನಗಾಗಿ ಮಾಡಿಟ್ಟ ತಂಬಿಟ್ಟು ಚಕ್ಕುಲಿ
ಕಾಯುತಿವೆ ನಿನ್ನ ಸ್ವೀಕಾರಕಾಗಿ ||
ನಿನ್ನ ಪೂಜೆಯ ಮಾಡೆ ಭಕ್ತಜನ ವೃಂದ ||
ಕಾದಿಹುದು ನಿನ್ನ ವರ ಭಿಕ್ಷೆಗಾಗಿ
||ಬೆಳಗಾಯ್ತು ಏಳು||
***