ಮೆಲ್ಲ ಮೆಲ್ಲನೆ ಬಂದನೇ 

ಗೋಪಮ್ಮ ಕೇಳೇ  ಮೆಲ್ಲ ಮೆಲ್ಲನೇ ಬಂದನೇ ||

|| ಪ ||

ಮೆಲ್ಲಮೆಲ್ಲನೆ ಬಂದು ಗಲ್ಲಕೆ ಮುದ್ದ ಕೊಟ್ಟು ||

ನಿಲ್ಲದೆ ಓಡಿಹೋದ ಕಳ್ಳಗೆ ಬುದ್ಧಿ ಪೇಳೆ ||

|| ಮೆಲ್ಲ ಮೆಲ್ಲನೆ ||

ಹಾಲು ಮಾರಲು ಪೋದರೆ ನಿನ್ನಯ ಕಂದ

ಕಾಲಿಗಡ್ಡವ ಕಟ್ಟಿದ ||

ಹಾಲಾ ಸುಂಕವ ಬೇಡಿ ಕೋಲನ್ನೇ ಅಡ್ಡಕಟ್ಟಿ ||

ಸೀರೆಯ ಸೆಳಕೊಂಡು ಹೇಳದೋಡಿದ ಕೃಷ್ಣ ||

|| ಮೆಲ್ಲ ಮೆಲ್ಲನೆ ||

ಮೊಸರ ಮಾರಲು ಪೋದರೆ ನಿನ್ನಯ ಕಂದ ಹೆಸರೇನಂದಲಿ ಕೇಳಿದ ||

ಹಸನಾದ ಹೆಣ್ಣ ಮೇಲೆ ಕುಸುಮಾವ ತಂದಿಕ್ಕಿ ||

ಶಶಿಮುಖಿಯರನೆಲ್ಲ ವಶವ ಮಾಡಿದನೀತ ||

|| ಮೆಲ್ಲ ಮೆಲ್ಲನೆ ||

ಪೋಗಿರೆ ರಂಗಯ್ಯನ ಮೇಲೆ ನೀವು ದೂರೇನು ಕೊಂಡುಬಂದಿರೆ ||

ಯೋಗೀಶ ಪುರಂದರ ವಿಠಲ ನಾರಾಯಣ ||

ತೂಗಿಪಾಡಿರೆ ಬೇಗ ನಾಗವೇಣಿಯರೆಲ್ಲ ||

|| ಮೆಲ್ಲ ಮೆಲ್ಲನೆ ||

|

***