ಚಂದ್ರಚೂಡ ಶಿವ ಶಂಕರ ಪಾರ್ವತಿ 

ರಮಣಾ ನಿನಗೆ ನಮೋ ನಮೋ ||

|| ಪ ||

ಸುಂದರಮೃಗಧರ ಪಿನಾಕ ಧನುಕರ

ಗಂಗಾಶಿರ ಗಜಚರ್ಮಾಂಬರಧರ || 

|| ಚಂದ್ರಚೂಡ ಶಿವ ||

ನಂದಿವಾಹನ ನಂದದಿಂದ ಮೂರ್ಜಗದಿ 

ಮೆರೆವನು ನೀನೇ ||

ಅಂದು ಅಮೃತಘಟದಿಂದುದಿಸಿದ ವಿಷ 

ತಂದು ಭುಜಿಸಿದವ ನೀನೇ ||

ಕಂದರ್ಪನ ಕ್ರೋಧದಿಂದ ಕಣ್ತೆರೆದು

 ಕೊಂದ ಉಗ್ರನು ನೀನೇ || 

ಇಂದಿರೇಶ ಶ್ರೀರಾಮನ ಪಾದವ 

ಚಂದದಿ ಪೊಗಳುವ ನೀನೇ ||

|| ಚಂದ್ರಚೂಡ ಶಿವ ||

ಧರೆಗೆ ದಕ್ಷಿಣ ಕಾವೇರಿತೀರ

ಕುಂಭಪುರವಾಸನು ನೀನೇ ||

ಕರದಲಿ ವೀಣೆಯ ನುಡಿಸುವ ನಮ್ಮ

ಉರಗ ಭೂಷಣನು ನೀನೇ ||

ಕೊರಳೊಳು ಭಸ್ಮ ರುದ್ರಾಕ್ಷಿಯ ಧರಿಸಿದ

ಪರಮ ವೈಷ್ಣವನು ನೀನೇ ||

ಗರುಡ ಗಮನ ನಮ್ಮ ಪುರಂದರ ವಿಠಲಗೆ

 ಪ್ರಾಣ ಪ್ರಿಯನು ನೀನೇ||

|| ಚಂದ್ರಚೂಡ ಶಿವ ||