ನಿನ್ನ ಒಲುಮೆಯಿಂದ ನಿಖಿಲ ಜನರು ಬಂದು 

ಮನ್ನಿಸುವರೋ ಮಹರಾಯ||

ಎನ್ನ ಪುಣ್ಯಗಳಿಂದ ಈ ಪರಿ ಉಂಟೇನೋ ||

ನಿನ್ನದೇ ಸಕಲ ಸಂಪತ್ತು |

|| ನಿನ್ನ ಒಲುಮೆಯಿಂದ ||

ಜೀರ್ಣಮಲಿನ ವಸ್ತ್ರಕಾಣದ ಮನುಜಗೆ 

ಪೂರ್ಣವಿಚಿತ್ರ ಸುವಸನಾ

ವರ್ಣವರ್ಣದಿಂದ ಬಾಹೋದೇನೋ

ಸಂಪೂರ್ಣ ಗುಣಾರ್ಣವ ದೇವಾ |

ಸಂಜಿ ತನಕ ಇದ್ದು ಸಣ್ಣ ಸೌಟಿನ ತುಂಬ 

ಗಂಜಿ ಕಾಣದೆ ಬಳಲಿದೆನೋ || 

ವ್ಯಂಜನ ನಾನಾ ಸುಭಕ್ಷ್ಯ ಭೋಜ್ಯಂಗಳ 

ಭುಂಜಿಸುವದು ಮತ್ತೇನೋ | 

|| ನಿನ್ನ ಒಲುಮೆಯಿಂದ ||

ಒಬ್ಬ ಹೆಂಗಸಿನ ಹೊಟ್ಟೆಗೆ ಹಾಕುವುದಕಿನ್ನು 

ತಬ್ಬಿಬ್ಬುಗೊಂಡೇ ನಾ ಹಿಂದೇ |

ನಿಬ್ಬರ ದಿಂದಲಿ ಸರ್ವರ ಕೂಡುಂಬೊ  

ಹಬ್ಬದೂಟವ ನೀನುನಿಸುವಿಯೋ |

ಮನೆ ಮನೆ ತಿರುಗಿದರೂ ಕಾಸು ಪುಟ್ಟದೆ 

ಸುಮ್ಮನೆ ಚಾಲ್ವರಿದು ಬಳಲಿದೇನೋ

ಹಣಹೊನ್ನು ದ್ರವ್ಯ ಒಮ್ಮಿಂದೊಮ್ಮಿಗೆ ಈಗ 

ಎನಗೆ ಪ್ರಾಪ್ತಿ ನೋಡೊ ಜೀಯಾ |

|| ನಿನ್ನ ಒಲುಮೆಯಿಂದ ||

ಮದ್ಯಾಹ್ನ ಕಾಲಕ್ಕೆ ಅತಿಥಿಗಳಿಗೆ ಅನ್ನ

ಮೆದ್ದೇನೆಂದರೆ ಈಯದಾದೆ |

ಈ ದರೆಯೊಳಗೆ ಸತ್ಪಾತ್ರರ ಕೂಡುಂಬೋ 

ಪದ್ಧತಿ ನೋಡೋ ಧರ್ಮಾತ್ಮಾ |

ನೀಚೋಚ್ಛ ತಿಳಿಯದೆ 

ಸರ್ವರ ಚರಣಕೆ ಚಾಚಿದೆ ನೊಸಲ ಹಸ್ತಗಳ |

ಯೋಚಿಸಿ ನೋಡಲು ಸೋಜಿಗವಾಗಿದೆ 

ವಾಚಕೆ ನಿಲುಕದೊ ಹರಿಯೇ|

|| ನಿನ್ನ ಒಲುಮೆಯಿಂದ ||

ವೈದಿಕ ಪದವಿಯನೀವಾಗೆ ಲೌಕಿಕ

ನೈದಿಸುವದು ಬಾಳು ಖ್ಯಾತೆ|

ಮೈದುನಗೊಳಿದ ಶ್ರೀ ವಿಜಯ ವಿಠಲ ನಿನ್ನ ||

ಪಾದಸಾಕ್ಷಿಯ ಅನುಭವವೋ |

|| ನಿನ್ನ ಒಲುಮೆಯಿಂದ || 

***